يۈكسەل بلوگى

ئۇزبلوگ ئۇلىنىشلىرى ۋە 10 چوڭ بلوگ ھەققىدە دىلبايان

يۈكسەل — Thu, 09 Feb 2012 19:32:23 +0800

ئەسسالامۇ ئەلەيكۇم، تورداشلار!
بۇ يازما ئارقىلىق ھەرقايسىلىرىغا تونۇشلۇق بولغان «ئۇزبلوگ ئۇلىنىشلىرى» ۋە «ئۇيغۇرلاردىكى يىللىق 10 چوڭ بلوگنى باھالاش پائالىيىتى» ھەققىدە ھەرقايسىلىرى بىلەن مۇڭداشقۇم كەپ قالدى. شۇ تاپتا قايرىلىپ كەينىمگە قاراپ باقسام، كەمىنە يۈكسەل 2008-يىلى ئۇيغۇر بلوگگېرلار سېپىگە قوشۇلغاندىن بېرى، گاھى ئوڭ گاھى سوڭ دەسسەپ دېگۈدەك، ھەرھالدا سەپتىن قالماي، تور دۇنيارىمىزدىكى مۇشۇ ئۆزگىچە توپ ئۈچۈن قولۇمدىن كېلىشىچە بىر ئىشلارنى قىلىپ كەپتىمەن. نېمە دەيمىز، ئىشقما؟ ھەئە، بلوگ ئىشقى!
بلوگباس سۇپىسىدىكى چاغلاردا «ئۇيغۇر بلوگ ئۇيۇشمىسى»نى قۇرۇپ بېقپتىمەن، «رېشتە بلوگ ئۇلىنىشلىرى» نى ئېلان قىلىپتىمەن. مۇستەقىل بلوگ سۇپىسىغا كۆچكەندە بولسا «ئۇيغۇرلاردىكى 10 چوڭ بلوگنى باھالاش پائالىيىتى»نى ھەر يىلى ئۆز قەرەلىدە ئۆتكۈزۈپ، ھازىرغىچە جەمئىي 3 نۆۋەت ئۇتۇقلۇق تەشكىللەپ كەپتىمەن، «ئۇزبلوگ ئۇلىنىشلىرى»نى ئېلان قىلىپتىمەن. ئېيتاۋۇر، ھەر ھالدا ئىزىمغا سەكرىمەي، ئاستا ماڭساممۇ ئالغا چامداپ، يۈكسىلىپ كەپتىمەن…
خۇش، ھالا بۈگۈنگە كەلگەندە، ئۇيغۇر بلوگچىلىقى گۈللىنىپ، تورچىلىقىمىزدا ئۆزىگە خاس كۆلەم ۋە تەسىرگە ئىگە بولغان سۆيۈنەرلىك ۋەزىيەت بارلىققا كەلدى. تورداشلارنىڭ بلوگلاردىن ئېرىشىدىغانلىرى كۆپەيگەنچە، بلوگگېرلاردىن كۈتىدىغان ئۈمىدىمۇ ئېشىپ ماڭدى، بىزگە تىكىلىدىغان قاركۆزلەر جىقايدى. دېمەكچى، ئۇيغۇر بلوگچىلىقى يېڭى بىر تەرەققىيات پەللىسىگە قەدەم قويدى. بۇ خىل يېڭىچە مەنزىل، يېڭىچە تەرەققىيات مەن ئۆزۈم بىر قوللۇق تەشكىللەۋاتقان «ئۇيغۇرلاردىكى 10 چوڭ بلوگنى باھالاش پائالىيىتى» ۋە يۈكسەل بلوگى قارمىقىدىكى ئۇيغۇرچە ئۇز بلوگلارنىڭ جەمگاھى «ئۇزبلوگ ئۇلىنىشلىرى» غا يەنىمۇ يۇقىرى بولغان، يېڭىچە تەلەپلەرنى قويماقتا. ھالبۇكى، بۇ تەلەپلەرنىڭ ھۆددىسىدىن يالغۇز شەخسنىڭ چىقىپ بولالىشى ناتايىن ئىدى.
مۇشۇ كۈنلەردە تەكرار ئويلىنىش ئارقىلىق تۆۋەندىكىدەك قارارغا كەلدىم:

بىرىنچى، يۈكسەل بلوگى تەشكىللەپ، ئۇيۇشتۇرۇپ كېلىۋاتقان «ئۇيغۇرلاردىكى يىللىق 10چوڭ بلوگنى باھالاش پائالىيىتى» نىڭ تەشكىللەش ھوقۇقى شىنجاڭ كومپيۇتېر ھەۋەسكارلىرى گۇرۇپپىسى (XJCFAN) غا ئۆتكۈزۈپ بېرىلىدۇ. 2012-يىلىدىن باشلاپ، مەزكۇر پائالىيەتنى شىنجاڭ كومپيۇتېر ھەۋەسكارلىرى گۇرۇپپىسى تەشكىللەپ ئۇيۇشتۇرىدۇ.

ئىككىنچى، يۈكسەل بلوگى باشقۇرۇشىدىكى «ئۇزبلوگ ئۇلىنىشلىرى»نىڭ باشقۇرۇش ھوقۇقى « ئىقتىسادىي ئۈنۈم ياراتماسلىق ۋە قوغلاشماسلىق، بلوگگېرلار ئۈچۈن خالس خىزمەت قىلىش» ئالدىنقى شەرتى ئاستىدا شىنجاڭ كومپيۇتېر ھەۋەسكارلىرى گۇرۇپپىسىغا ئۆتكۈزۈپ بېرىلىدۇ.

تورداشلارنىڭ مەزكۇر ئىشتىن ۋاقىپ بولۇپ قېلىشىنى، مۇشۇلارغا ئالاقىدار ئىشلار بولسا بىۋاسىتە XJCFAN بىلەن ئالاقە قىلىشىنى سەمىمىي ئۈمىد قىلىمەن. مەنمۇ ئەمدى ئاراڭلارغا قايتىپ، تەڭرىم نىسىپ قىلسا ھەقىقى ئاددىي بلوگگېر سالاھىيىتىدە يىللىق 10 چوڭ بلوگنى باھالاش پائالىيىتىگە قاتنىشىمەن.

تورداشلار شۇ تاپتا ئوقىۋاتقان يازمىلار :

«كىتاب ئوقۇش ماھارىتى ۋە ئۇنىڭ تەئرىباتى» ھەققىدە رادىئو سۆھبىتى

يۈكسەل — Sun, 05 Feb 2012 01:10:18 +0800

2012–يىلى 2–ئاينىڭ 5-كۈنى ( يەكشەنبە ) ئۈرۈمچى ۋاقتى كەچ سائەت 7:00 دە، شىنجاڭ خەلق رادىئوسىنىڭ نادىر پروگراممىسى ھېسابلانغان «ياشلىق مىلودىيەسى» دە، ئەلداۋا ساغلاملىق تورى ۋە يۈكسەل بلوگىنىڭ مەسئۇلى ئەلقەم ئىلھام يۈكسەل ئىشتراكچىلىقىدىكى، «كىتاب ئوقۇش ماھارىتى ۋە ئۇنىڭ تەئرىباتى» ھەققىدە نەقمەيدان سۆھبىتى ئاڭلىتىلماقچى. مەزكۇر سۆھبەتكە قىزىققۇچى تورداشلارنىڭ ئۆز ۋاقتىدا ياقتۇرۇپ ئاڭلىشىنى ئۈمىد قىلىمىز!

شىنجاڭ خەلق رادىئو ئىستانىسىسى
يۈكسەل بلوگى

2012-يىلى 2-ئاينىڭ 4-كۈنى

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

ئەلداۋا «ياشلىق مىلودىيەسى» دە

يۈكسەل — Fri, 27 Jan 2012 01:23:25 +0800

2012–يىلى 1–ئاينىڭ 26-كۈنى ( پەيشەنبە ) ئۈرۈمچى ۋاقتى كەچ سائەت 7:00 دە، شىنجاڭ خەلق رادىئوسىنىڭ نادىر پروگراممىسى ھېسابلانغان «ياشلىق مىلودىيەسى» دە ئەلداۋا ساغلاملىق تورىنىڭ مەسئۇلى ئەلقەم ئىلھام يۈكسەل ئىشتراكچىلىقىدىكى«ئەلداۋا ساغلاملىق تورى» ھەققىدە نەقمەيدان سۆھبىتى ئاڭلىتىلغان ئىدى. تۆۋەندە مەزكۇر سۆھبەتنىڭ ئۈن ھۆججىتى بېرىلدى، ساغلاملىقىغا كۆڭۈل بۆلگۈچى كەڭ تورداشلارنىڭ ياقتۇرۇپ ئاڭلىشىنى ئۈمىد قىلىمىز!

شىنجاڭ خەلق رادىئو ئىستانسىسى

ئەلداۋا ساغلاملىق تورى

2012-يىلى 1-ئاينىڭ 26-كۈنى

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

ئىسىم-تەگئات ھەققىدە رادىئو سۆھبىتى

يۈكسەل — Sat, 21 Jan 2012 20:20:21 +0800

2012 – يىلى 1– ئاينىڭ 22- كۈنى ( يەكشەنبە ) ئۈرۈمچى ۋاقتى سەھەر سائەت 8 دىن 9 غىچە ئاڭلىتىلىدىغان شىنجاڭ خەلق رادىئو ئىستانسىسىنىڭ نادىر ئۇيغۇرچە ئاڭلىتىش پروگراممىسى ‹‹ يەكشەنبىلىك سۆھبەت ›› تە، ئەلداۋا ساغلاملىق تورى ۋە يۈكسەل بلوگىنىڭ مەسئۇلى ھېسابلانغان كەمىنە يۈكسەلنىڭ ئىشتىراك ئېتىشىدىكى ‹‹ ئۇيغۇرلاردا ئىسىم-تەگئات ›› نەقمەيدان سۆھبىتى ئاڭلىتىلغان ئىدى. مەزكۇر سۆھبەتنى ئۆز ۋاقتىدا رادىئودىن ئاڭلىيالمىغان تورداشلارنىڭ ئاڭلىشى ئۈچۈن مەزكۇر سۆھبەتنىڭ ئۈن ھۆججىتىنى ئېلان قىلدۇق. ئۇيغۇر ئىسىم-تەگئاتشۇناسلىقىغا قىزىققۇچى تورداشلارنىڭ ياقتۇرۇپ ئاڭلىشىنى ئۈمىد قىلىمىز!

شىنجاڭ خەلق رادىئو ئىستانىسىسى
يۈكسەل بلوگى

2012- يىلى 1- ئاينىڭ 24- كۈنى

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

[خوش-خەۋەر] UTV «ئىقتىساد كۆزنىكى» دە ئەلداۋا

يۈكسەل — Fri, 20 Jan 2012 23:05:19 +0800

ئەسسالامۇ ئەلەيكۇم، تورداشلار!
ئۈرۈمچى تېلېۋىزىيە ئىستانسسىسى ئەلداۋا ساغلاملىق تورىنى كۆرۈرمەنلەرگە تەشۋىق قىلىش، تونۇشتۇرۇش ئەھمىيىتى بار بولغان، ئاۋام-خەلققە بەلگىلىك ئەمەلىي نەپ ئېلىپ كەلگەن كەسپىي تور بېكەتلەرنىڭ بىرى دەپ قاراپ، << ئىقتىساد كۆزنىكى >> پروگراممىسىدا مەخسۇس ئەلداۋا ساغلاملىق تورىمىزنى تونۇشتۇرۇپ بىر فىلىم ئىشلىگەن ئىدى. مەزكۇر فىلىم بۈگۈن كەچتىن باشلاپ ئۈرۈمچى تېلېۋىزىيىسى ئۇيغۇرچە ئۇنىۋېرسال قانىلىدا ئۇدا بىر ھەپتە قويۇلماقچى. كونكېرت قويۇلۇش ۋاقتى تۆۋەندىكىچە:

بۈگۈن جۈمە كەچ : ئۈرۈمچى ۋاقتى 6:50 دىن 7:20 گىچە.
ئەتە شەنبە ئەتىگەن: ئۈرۈمچى ۋاقتى 7:00 دىن 7:30 غىچە.
كېلەر ھەپتە سەيشەنبە كۈنى چۈشتە: ئۈرۈمچى ۋاقتى سائەت 11:30-12:00 گىچە
كېلەر ھەپتە چارشەنبە كۈنى كەچ: ئۈرۈمچى ۋاقتى سائەت 5:30-6:00 گىچە

مەزكۇر فىلىم تەپسىلاتىغا قىزىققۇچى تورداشلارنىڭ ۋاقىپ بولۇپ قېلىشىنى ۋە ۋاقتىدا كۆرۈشىنى ئۈمىد قىلىمىز! تېلېۋۇزۇر كۆرۈش ئىمكانى بولمىغان ۋەياكى ۋاقتىدا كۆرەلمىگەن تورداشلار ئۈچۈن كېلەر ھەپتە ئىچىدە ئەلداۋا ساغلاملىق تورىمىزدا مەزكۇر فىلىم سىن ھۆججىتى ئېلان قىلىنىدۇ.

ھۆرمەت بىلەن:

ئەلداۋا ساغلاملىق تورى
2012-يىلى 20-يانۋار

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

كىتاب ئوقۇش ماھارىتى ۋە ئۇنىڭ تەئرىباتى

يۈكسەل — Sat, 14 Jan 2012 01:12:46 +0800

م . ئا . يۈكسەل

كىتاب – قىممەت باھا يۈكنى ئەجدادتىن ئەۋلادقا يەتكۈزىدىغان كېمە.

- بىكۇن

ناداننىڭ بىر ئەسىرلىك ئۆمۈرى بىلىملىك كىشىنىڭ يېرىم ئەسىرلىك ئۆمرىدىن كۆپ قىسقا بولىدۇ. كىتاب ئىنسانىيەت تارىخىنىڭ ئۆلمەس روھى ، كىتاب كەڭ مەنىدە ئىنسانىيەت بىلىش تارىخى ۋە ئىنساننىڭ تەسەۋۋۇر بوشلۇقىنىڭ سەھىيپىلەشكەن شەكلىدىن ئىبارەت. كىتاب ئىنسان قەلبىدىكى كائىنات.

- ئابدۇشۈكۈر مۇھەممەدئىمىن

كىتاب – دۇنيانىڭ تارىختىن بۇيانقى بىھېساب مەنىۋى بايلىقلىرى ۋە دۇنيانىڭ تۈرلۈك – تۈمەن يېڭىلىقلىرى مۇجەسسەملەنگەن، ئىخچاملانغان ۋە يەكۈنلەنگەن << ئېچىل داستخېنىم >>. كىتاب ئادەمنى مەنىۋىيەتنىڭ قاراڭغۇ زىندانلىرىدىن ئازاد قىلىپ، ئەقلىيەتنىڭ يورۇق دۇنياسىغا چىقىرىشتىكى ئالتۇن شوتا. كىتاب مەنىۋى بالاغەتكە يېتىشنىڭ سۇنماس قانىتى. كىتاب دۇنيا، جەمئىيەت ۋە كائىنات سىرلىرىنى ئېچىشتىكى سېھىرلىك ئاچقۇچ.
كىتابنىڭ خاسىيىتى ۋە كارامىتى تەسۋىرگە سىغماس، قۇدرىتى بىقىياس. ئەنە شۇنداق تەييار مەنىۋى بايلىق غەزىنىسى بولغان كىتابتىن قانداق پايدىلىنىش، مەنپەئەتلىنىش ھەربىر ئادەمنىڭ كىتاب ئوقۇش ماھارىتىنىڭ قانداق بولۇشىغا باغلىق. بۇ ماقالىدا مەن ئۆزۈمنىڭ كىتاب ئوقۇش تەسراتلىرىغا بىرلەشتۈرۈپ كىتاب ئوقۇش ماھارىتى ھەققىدىكى قاراشلىرىمنى قىسقىچە بايان قىلىمەن.

كىتابنى قانداق ئوقۇش كېرەك؟

بەزىلەر ھەركىم ئۆز خاھىشىغا ماس كېلىدىغان، ئۆزى قىزىقىدىغان كىتابلارنى ئوقۇش كېرەك، دېيىشى مۇمكىن. بۇ ، توغرا ئەمەس. ھەرقانداق ئادەمدە ئالدى بىلەن مەلۇم دەرىجىدە ئۇنىۋېرسال بىلىم ئاساسى بولۇشى كېرەك. ئۇنىۋېرسال بىلىم ئەلۋەتتە تىل – ئەدەبىيات، ماتېماتىكا ، فىزىكا ، خىمىيە، جۇغراپىيە، تارىخ، پەلسەپە، دىن ئىلمى، زامان سىياسەتلىرى، قانۇن ، ئېقىم مەسىلىلىرى، تېببىي ساۋات قاتارلىق ئاساسىي پەن تۈرىدىكى ماتېرىياللارنى ئۆگىنىشتىن كېلىدۇ.
پەلسەپە – ئەقىلشۇناسلىق ھەققىدىكى بىلىم بولۇپ ، ھەممە پەنلەرنىڭ جەۋھىرى- ئانىسى دېمەكتۇر. ھەركىمدە پەلسەپەدىن ئاساسى ساۋات بولىشى زۆرۈر. يۇقىرىقى پەنلەرنى ئۆگىنىش، ئىزدىنىشتىن ئادەم تامچە – تامچە ئەقىل دۇردانىلىرىگە ئېرىشىدۇ. بۇ ، تاما – تاما كۆل بولۇر، دېگەندەك، قانچە كۆپ بىلىمگە ئېرىشسە، كىشى شۇنچە كۆپ ئەقىل – پاراسەتكە ئىگە بولىدۇ، دېگەن گەپ. شۇڭا، نۆۋەتتىكى دۇنيا پەنلىرىدىن ھېچ بولمىغاندىمۇ ئاساسىي ساۋاتقا ئىگە بولۇش كېرەك. بۇ ئادەمنىڭ تەپەككۇر – پىكىر قىلىش، يول تېپىش، تەدبىر بەلگىلەش، مەسىلىلەرگە ھۆكۈم قىلىش ئىقتىدارىنى ئۆستۈرىدۇ. ئادەمنىڭ ياشاش سۈپىتى – ساپاسىنى ئۆستۈرۈپ، مەنىۋى ھاياتىنى بېيىتىپ، ياشاشنى ئاسانلاشتۇرىدۇ.
ھەركىمنىڭ كىتاب ئوقۇش مەقسەت – مۇددىئاسى ئوخشاش بولمايدۇ. نۇرغۇن كىشىلەر بىلىم ئېلىش، ئۆزىگە ئەقلى كۈچ تولۇقلاشنى نىشان قىلىپ كىتاب ئوقۇيدۇ. بەزىلەر ئۆزى شۇغۇللىنىۋاتقان ئىش – كەسپىگە ئالاقىدار يېڭى ئۇچۇر، يېڭى بىلىملەرنى ئىگىلەش، ئىزدىنىش، كەسىپتە يەنىمۇ ئىلگىرىلەش مەقسىتىدە كىتاب ئوقۇيدۇ. يەنە بەزى كىشىلەر ۋاقىت ئۆتكۈزۈش، ئىچ پۇشۇقىنى چىقىرىش ئۈچۈن كىتاب ئوقۇيدۇ. يەنە بەزىلەر تۇرمۇشتا دۇچ كەلگەن مەسىلىلىرىگە جاۋاب ئىزدەش، دەردىگە داۋا، رەنجىگە شىپا ئىزدەش، تەسەللىي تېپىش مەقسىتىدە كىتاب ئوقۇيدۇ. ھەركىمنىڭ كىتاب ئوقۇشتىكى مەقسەت – مۇددىئاسى ئوخشاش بولمىغاچقا،كىتاب تۈرى، مەزمۇنىغا ئاساسەن كىتاب ئوقۇش ئۇسۇلى، ماھارىتىمۇ ئوخشاش بولمايدۇ.
بەزىلەر ئۆزىگە زۆرۈر كېرەكلىك بولغان، دەرھال ئەسقاتىدىغان تېما – مەزمۇنلارنى، پەن – تېخنىكىغا دائىر كەسپىي كىتابلارنى ئوقۇشتا جەۋھەر كىتابلارنى تاللاپ ئوقۇيدۇ. بەزىلەر ئەدەبىي ئەسەرلەرنى ئوقۇشتا، ھەرخىل كەيپىيات تەسۋىرلىرى، ئىچكى ھىسيات تەسۋىرلىرىدىن ھالقىپ ئۆتۈپ، ۋەقەلىكلەرنىلا قوغلىشىپ ئوقۇيدۇ. يەنە بەزىلەر، ئەسەردىكى پېرسوناژلار ئايرىمىسى بويىچە ئاتلاپ ئوقۇيدۇ. تارىخى تەزكىرىلەرنى ئوقۇشتا، بەزىلەر يېزىلغان دەۋر بويىچە ۋەقەلىك قوغلىشىپ ئوقۇيدۇ. بەزىلەر يىل تەرتىپى بويىچە، شەخىسلەر بويىچە تۈرگە ئايرىپ ئوقۇيدۇ. دېمەك، ھەركىمنىڭ كىتاب ئوقۇش مۇددىئاسى، كىتاب ئوقۇش ئۇسۇل – ماھارىتى ئوخشىمايدۇ.
مېنىڭ ئۇزۇن يىللىق كىتاب ئوقۇش تەجرىبە، ھاسىلاتلىرىمدىن قارىغاندا، بىلىم ئىگىلىكى دەۋرى ، ئېلېكترون دەۋرى، ئۇچۇر دەۋرى دېيىلىۋاتقان بۈگۈنكى زاماندا، ھەركىم ئۆز ئېھتىياجىغا قاراپ تاللاپ – پرېسلاپ – ئىخچاملاپ ئوقۇش ئۇسۇلى بويىچە كىتاب ئوقۇسا كۆرۈنەرلىك ئۈنۈمگە ئېرىشەلەيدۇ. تۇرمۇش رېتىمى كۈنسېرى تېزلىشىۋاتقان بۈگۈنكى زاماندا، ياشلار، كەسپىي خادىملار تاللاپ ئوقۇش ئۇسۇلى بويىچە جەۋھەر كىتابلارنى ئوقۇمىسا، ھەممە كىتابلارنى ، ھەتتا ئۆز كەسپىگە مۇناسىۋەتلىك كىتابلارنىمۇ ئوقۇپ بولۇشقا ۋاقىت يار بەرمەيدۇ. شۇڭا، كىتابلارنى تاللاپ، مەزمۇنلارنى ئىخچاملاپ، پرېسلاپ ئوقۇش ئۇلارغا ماس كېلىدۇ.
لېكىن ھەممە كىتابلارنى بۇ خىل ئۇسۇلدا ئوقۇپ ئۈنۈم ھاسىل قىلماق مۇمكىن ئەمەس. شۇڭا، ھەركىم ئۆز ئەھۋالىغا، ئۆز كەسپىگە ماس كېلىدىغان ئۇسۇل بىلەن كىتاب ئوقۇماق زۆرۈر.
پەن – تېخنىكىغا ئائىت كىتابلارنى ئوقۇشتا، ئەڭ يېڭى نوپۇزلۇق كىتابلارنى ئوقۇماق كېرەك.
ئەدەبىي كىتابلارنى ئوقۇشتا، قەدىمقى كلاسسىك ئەسەرلەرنى ، جۇڭگو ۋە دۇنيا ئەدەبىياتىكى ۋەكىل خاراكتېرلىك نامايەندە ئەسەرلىرىنى تاللاپ ئوقۇماق كېرەك. ئۇلاردىن كېيىن، ئۆزىمىزدىكى ھەرخىل ژانىردىكى داڭلىق ئەسەرلەرنى ئوقۇماق كېرەك.
تارىخ – تەزكىرە ئەسەرلەرنى ئوقۇشتا، ئەڭ ياخشىسى قەدىمقىسىنى، ئەسلى نۇسخىسىنى ئوقۇش كېرەك. تارىخنى بىلمەسلىك،بولۇپمۇ ئۆز مىللىتىنىڭ تارىخىنى بىلمەسلىك- ئۆزىنىڭ كىملىكىنى بىلمەسلىك دېمەكتۇر. بۇ ئىنسان ئۈچۈن ئەڭ نۇمۇسلۇق ئىشتۇر. ئۆزىنىڭ ئۆتمۈشنى بىلمىگەن ئادەم-نادان ئادەم، بولۇمسىز ئادەم ۋە ئىستىقبالى قاراڭغۇ ئادەم دىمەكتۇر. بۇنى چەتئەلگە چىققانلار بەكرەك چۈشىنىدۇ. چەتئەللىكلەر سىز بىلەن پاراڭلاشقاندا، سىزنىڭ مىللىي كىملىكىڭىز – تارىخىڭىزغا بەكرەك قىزىقىدۇ. ئۆز كىملىكىڭىز – تارىخىڭىز ھەققىدە بىلىمىڭىز يېتەرلىك بولمىسا ئۇلار سىزگە مەنسىتمەسلىك نەزىرى بىلەن قارىشى مۇمكىن. شۇڭا، ئۆز ئېلىنىڭ ۋە ئۆز مىللىتىنىڭ تارىخىنى بىلىشنى ھەركىم ئۆزىنىڭ ۋىجدانەن بۇرچى دەپ ھېسابلىشى لازىم. يەنە دۇنيا تارىخىنىمۇ بىلىش زۆرۈر. تارىخي ئەسەرلەرنى، تەزكىرە خاراكتېرلىك ئەسەرلەرنى ئوقۇغاندا، ھادىسىدىن ھالقىپ ئۆتۈپ، ئەسلي ماھىيەتنى كۆرۈش كېرەك. چۈنكى، تارىخى ئەسەرلەر شۇ دەۋر سىياسى ئاتمۇسفېراسىنىڭ تەسىرىدىن خالىي بولالمايدۇ. نۇرغۇن تارىخى ئەسەرلەر دىنىي ۋە ئىجتىمائىي سۈپەت ، پەرداز، بېزەك ۋە نىقابلار بىلەن ئورالغان بولىدۇ. يەنە ئاپتۇرنىڭ سۇبيېكتىپ ئىدىيىسى ۋە بىلىم – ماتېرىيال ئاساسىنىڭ چەكلمىسىگە ئۇچرايدۇ. شۇڭا، تارىخ كىتابلىرىنى ئوقۇغاندا، تاللاپ ئوقۇش بىلەن ئىلغاپ – تاسقاپ ، سېلىشتۇرۇپ ئوقۇشنى بىرلەشتۈرۈش كېرەك.
ئېلېكترون-كومپيۇتېر تېخنىكىسىنىڭ ئۇچقاندەك تەرەققى قىلىشىغا ئەگىشىپ ، نەشرىياتچىلىق-باسمىچىلىق كەسپىمۇ تەسۋىرلىگۈسىز دەرىجىدە تەرەققى قىلدى، بۇرۇن بىر نەچچە ئاي، بىر نەچچە يىلدا نەشىر قىلىنىدىغان-بېسىلىدىغان كىتاب-قامۇسلار بۈگۈنكى كۈندە بىر نەچچە كۈندىلا بېسىلىپ چىقىپ، ئوقۇرمەنلەر بىلەن يۈز كۆرۈشىدىغان بولدى. بۇنىڭ بىلەن تۈرلۈك ئوقۇشلۇقلار مىسلىسىز دەرىجىدەكۆپەيدى. ھەممە ئادەمگە كەڭ كۇشادە بولغان كىتاب ئۇقۇش-بىلىم ئېلىش شارائىتى يارىتىلدى. لېكىن بۇنىڭغا ئەگىشىپ قىسمەن ھالدا خام-پىشمىغان مەنىۋى مەھسۇلاتلار،ھەتتا ئەخلەت يازمىلارمۇ بازارغا چىققىلى تۇردى.بۇ خىل ئەخلەت يازمىلار نۇرغۇن ئۇقۇرمەنلەرنىڭ قىممەتلىك ۋاقتىنى زايە قىلماقتا. شۇڭا دېمەكچىمەنكى، كىتاب دېگەندە-بىباھا، قىممەتلىك، بىلىم خاراكتېرلىك قۇرال كىتابلار، قامۇسلار، كەسپىي كىتابلار، ژۇرناللار كۆزدە تۇتۇلغاندۇر.
كىتابنى دىت بىلەن، نىشانلىق ئۇقۇش، مۇھىم مەزمۇنلار، جەۋھەر مەزمۇنلارنى خاتىرىلىۋېلىش، مەزمۇن تۇرى بويىچە كارتوچكا تۇرغۇزۇش-كىتاب ئۇقۇشتىكى ئادەمگە بىۋاستە نەپ بېرىدىغان ئاساسىي ماھارەتتۇر.
دېمەك، كىتاب- ئىنسان قەلبنى يورۇتقۇچى مەنىۋى مەشئەل، توغرىلىق، دۇرۇسلۇق، ئادالەتلىك، ۋىجدانلىق، مەردانىلىقنى ئۆگەتكۈچى يۈكسەك ئۇقۇل، ئەقىل-پاراسەت بۇلىقى، پارلاق ئىستىقبالغا باشلىغۇچى نۇرلۇق ماياكتۇر.

2012 -يىلى 5-يانۋار، شەھرى كاشىغەر

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

«كىتاب ئوقۇش ماھارىتى ۋە ئۇنىڭ تەئرىباتى» ھەققىدە رادىئو سۆھبىتى (0)

«ئەلداۋا» دىن تورداشلارغا يېڭى يىللىق سوۋغا

يۈكسەل — Thu, 05 Jan 2012 18:45:09 +0800

ئەسسالامۇ ئەلەيكۇم، تورداشلار!
ھەممىڭلارنىڭ يېڭى يىلىغا مۇبارەك بولسۇن! ئالتۇن بويۇڭلار سالامەت-ساغلام، بانكىدىكى پۇلۇڭلار كارامەت-باغلام بولسۇن ! …
مانا مۇشۇنداق قۇتلۇق مىنۇتلاردا، «ئەلنىڭ داۋاسى-بىزنىڭ غايىمىز!» دېگەن ئەقىدىنى كۆڭلىگە چىڭ پۈككەن ئەلداۋالىقلار، كەڭ تورداشلارنىڭ كۈچلۈك ئېھتىياجى، شۇنداقلا تەلىپىنى كۆزدە تۇتۇپ، ھوزۇرۇڭلارغا يەنە بىر يېڭىلىق- «ئەلداۋا ساغلاملىق مۇنبىرى» نى «بايراملىق سوۋغا» سۈپىتىدە سۇنۇپ تۇرۇپتۇ.

ئەلداۋا ساغلاملىق مۇنبىرىمىزنىڭ ساغلاملىققا دائىر سەھىپىلىرى رەڭدار، مەزمۇنى مول، كەسىپچانلىقى يۇقىرى بولۇپ، چىرايلىق لايىھىلەنگەن بەت يۈزى سىزگە ئازادىلىك بېغىشلىسا، ئىچىدىكى سەر خىل مەزمۇنلار سىزنى ساغلاملىققا ئائىت نۇرغۇن بىلىم ۋە ئۇچۇرلار بىلەن تەمىنلەيدۇ . مۇنبىرىمىزنىڭ يەنە مىكروبلوگ ، ھويلا ، گۇرۇپپا ئىقتىدارلىرى ئېچىۋېتىلگەن بولۇپ، سىز ئۆزىڭىزنىڭ ئەڭ يېڭى ئۇچۇرلىرىنى تورغا چىقىرالايسىز، باشقىلارنىڭ ساغلاملىق تېپىدىكى رەسىم، فىلىم، يازغان خاتىرىسىدىن تەڭ ھەمبەھىرلىنەلەيسىز، كۈندىلىك خاتىرە يازالايسىز، ھويلىڭىزنى ئۆزىڭىز ياقتۇرىدىغان شەكىلدە بېزىيەلەيسىز، مۇنبەر كۆرۈۋاتقان ساقلىق سۆيەر تورداشلار بىلەن پاراڭلىشالايسىز، ئۆز ئارا سۆز قالدۇرالايسىز. ھەممىدىن مۇھىمى، ساغلاملىققا ئائىت مەسىلىلەر توغرىسىدا مۇنبەر يۈزىدە مۇتەخەسسىس دوختۇرلاردىن مەسىلىھەت ئالالايسىز …

شۇنىڭغا ئىشەنچىمىز كامىلكى، ئەلداۋا ساغلاملىق مۇنبىرى ساغلاملىققا ئىنتىلىدىغان ساقلىق سۆيەر كىشىلەر ياقتۇرۇپ زىيارەت قىلىپ پايدىلىنىدىغان، دىيارىمىزدىكى بىر قەدەر نوپۇزغا ئىگە تېببىي مۇتەخەسسىسلەر، دوختۇر-ھەكىملەر توپلاشقان، سەھىيە ساھەسىدىكى دوستلار كەسپىي جەھەتتە ئۆز-ئارا پىكىر ئالماشتۇرىدىغان، ئۆگىنىدىغان، ئۆزىنى نامايان قىلىدىغان ئېسىل سورۇن، شۇنداقلا بىمارلارنىڭ نىداسىنى دوختۇر-ھەكىملەرگە ئۇلاشتۇرۇپ، ئۇلارنى كېسەللىك تەشۋىشىدىن خالاس قىلىدىغان كاتتا سورۇن بولۇپ قالغۇسى!

تورىمىز بۈگۈندىن باشلاپ مۇنبەرنى سىناق تەرىقىسىدە ئېچىۋەتتى. ساقلىق سۆيەر كەڭ تورداشلارنىڭ بىزنى مۇنبەر توغرىسىدىكى قىممەتلىك تەكلىپ -پىكىرلىرى بىلەن تەمىنلىشىنى ، مۇنبەرنى بىز بىلەن بىرلىكتە تەڭ باشقۇرۇپ، تەڭ نازارەت قىلىشىنى، مۇنبەرنى ئۇيغۇرچە كەسپىي ساغلاملىق مۇنبەرلىرىنىڭ ھەقىقىي سەركىسى قىلىش ئۈچۈن تەڭ تىرىشىشىنى چىن كۆڭلىمىزدىن ئۈمىد قىلىمىز !

ئەلداۋا ساغلاملىق تورى

ئەلداۋا ساغلاملىق مۇنبىرىنىڭ ئادرىسى: http://bbs.eldawa.com/forum.php

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

10 چوڭ بلوگنى باھالاش توغرىسىدىكى غەلدى-غەشتى پاراڭلار

يۈكسەل — Mon, 02 Jan 2012 02:09:21 +0800

بۇ تېمىنى يېزىش-يازماسلىق ھەققىدە كۆپ ئويلاندىم. ئاقىۋەت، ھېچبولمىغاندا كۆڭلۈمدىكى بەزى گەپلەرنى تورداشلارغا ئېيتىشنى، بلوگ باھالاش ھەققىدىكى بەزى غەلدە-غەشتە پاراڭلاردىن ئۇلارنى خەۋەردار قىلىپ قويغۇم كەلدى.
تورداشلارنىڭ خەۋرىدە بولغىنىدەك، يۈكسەل بلوگى 2008-يىلىدىن باشلاپ ھەر يىلى ئۇيغۇرلاردىكى يىللىق 10 چوڭ بلوگنى باھالاش پائالىيىتىنى تەشكىللەپ كېلىۋاتىدۇ. ھازىرغىچە جەمئىي 3 نۆۋەت ئۇيغۇرلاردىكى يىللىق 10 چوڭ بلوگنى باھالاپ چىققان بولدۇق. بۇ جەرياندا نۇرغۇن ئىسسىق-سوغۇقلارنى بېشىمىزدىن كەچۈرۈپ، ئوي-دوڭقۇللارنى بېسىپ ئۆتتۇق. باشقا ئىشلارنى دېمىگەندىمۇ مەزكۇر پائالىيەتكە كۆپ ئەقىدە، زېھىن، ۋاقىت سەرپ قىلدۇق. نېمە ئۈچۈن؟!… بىرلا سەۋەب، ئۇيغۇر تور مەدەنىيىتىنى چامىمىزنىڭ يەتكەن يېرىچە جانلاندۇرۇش، ئاشۇ ئۈن-تىنسىز بلوگ يېزىۋاتقان، ئۆزلىرىگە تالىق بولغان مۇئەييەن ئارزۇ-ئىستەكلىرى بىلەن ھارماي ئەجىر قىلىۋاتقان بلوگگېرلار ئۈچۈن ئۆزىنى نامايان قىلىدىغان ياخشى سورۇن ھازىرىلاش، ئۇيغۇر بلوگچىلىق تەرەققىياتىغا مۇئەييەن دەرىجىدە تۈرتكە بولۇشتىن ئىبارەت خالاس! بۇندىن ئۆزگە مەقسەت-مۇددىئا بىزنىڭ ئۇدا بىرقانچە يىل، شۇنچىلىك زېھىن، شۇنچىلىك ۋاقىت، شۇنچىلىك ئەقىدە سەرپلىشىمىزگە زىنھار ئەرزىمەيدۇ……
شۇنىڭغا ھېچ كۆز يۇمالمايمىزكى، زور كۆپ ساندىكى تورداشلارنىڭ، بلوگگېرلارنىڭ قوللاپ-قۇۋۋەتلىشى بولمىغاندا، مەزكۇر پائالىيەتنىڭ 3 يىللىق تارىخنى بېشىدىن كەچۈرەلىشى مۇمكىن ئەمەس، ئەلۋەتتە. پەقەت شۇنىڭغا ئوخشاپ كەتكەن تۈرلۈك شەكىلدىكى قوللاش سادالىرى بىزگە مەزكۇر پائالىيەتنى ئۈزۈپ قويماي داۋاملىق ياخشى تەشكىللەش ھەققىدە كۈچ-ماغدۇر بېغىشلاپ تۇرۇپتۇ.
ئەمما، ئىشلار ھەر زامان ئۇنچە ئوڭۇشلۇق بولۇپ كەتكىنى يوق. 10 چوڭ بلوگنى باھالاشنىڭ ھەر نۆۋىتىدە گاھى ئۇنداق گاھى مۇنداق مەسىلىلەر ئوتتۇرىغا چىقىپ، بېشىمىزنى ئاغرىتقان، زېھنىمىزنى ئۇپراتقان، تورداشلارنى قاقشاتقان بولدى. مەسىلەن، 1-، 2-نۆۋەتلىك باھالاشلاردا ساختا بېلەت تاشلاش ئىشى بېشىمىزنى خېلى ئاغرىتتى. بولۇپمۇ 2010-يىللىق 10 چوڭ بلوگنى باھالاشتا، تەكرار ئاگاھلاندۇرۇش بەرگەن بولساقمۇ ساختا بېلەت تاشلاش ئىشى ئەدىسە ئەدىدىكى ھەرگىز بېسىقىپ قالمىدى. ئەڭ ئاخىرىقى بېلەت ستاتىستىكا قىلىدىغان چاغدا، كۆككەپتەر بىلەن ئىككىمىز ئۇدا 3 كۈن كېچىسى ئۇخلىماي ساختا بېلەتلەرنى بىرمۇ-بىر ئىلغاپ چىققانلىقىمىز بايقىدەكلا يادىمدا. تورداشلارمۇ بېلەت تاشلاش سىستېمىسىغا ئىزچىل گۇمانىي قاراشتا بولۇپ، باھالاشنىڭ نەتىجىسىدىن ئەندىشە قىلغان، ھەتتا بەزىلەر قايىل بولمايمۇ قويغان ئىدى. ئەمما، توردىن ئاز-تولا خەۋرى بار كىشى ئۈچۈن شۇنىسى سىر ئەمەسكى، ساختا بېلەت تاشلاشتىن مۇتلەق ساقلىنىش زادىلا مۇمكىن ئەمەس ئىدى. cookies چەكلىسىڭىز كومپيۇتېرنى تازىلاپلا تەكرار تاشلىغىلى بولاتتى،IP نى چەكلىسىڭىز مودېمنى ئۆچۈرۈپ قايتا ئاچسىلا ئالمىشاتتى-دە ، يەنە تاشلىغىلى بولاتتى. ئەڭ بولمىغاندا، 1 ئادەم بىرقانچە كومپيۇتېردا بىرقانچە بېلەت تاشلىغىلى بولاتتى… ھەممىدىن يامان يېرى، بىر قىسىم تورداشلاردىكى، بولۇپمۇ ئىنتايىن ئاز ساندىكى بلوگگېرلاردىكى كىشىلىك پەزىلەت، سەمىمىيەت شۇنچىلىك ئىدى.
2011-يىللىق 10 چوڭ بلوگنى باھالاشتا، گەرچە ۋاقىت ئىلگىرىكىدىن زور دەرىجىدە قىسىلغان بولسىمۇ، ئەمما كۈچ ئاز سەرپ قىلىنغىنى، سەل قارالغىنى يوق. باشقا گەپنى دېمىگەندىمۇ، باھالاش ھەيئەت گۇرۇپپىسىدىكى ئالىم ئەھەت، قىسمەت، كۆككەپتەر، مىسرانىم، ئوسمانجان نوھ بىلىگيار، كروران، جۇلالىق، مەن قاتارلىق ئەزالار ھەر بىر بلوگقا ناھايىتى ئەستايىدىل مۇئامىلە قىلىپ، باھالاشتىن ئىلگىرى ئېلان قىلىنغان ئۆلچەملەر بويىچە بىرمۇ-بىر تەكشۈرۈپ، باھالاپ نومۇر قويۇپ چىقتۇق. بۇ قېتىم باھالاشنىڭ شۇنچىلىك ئەستايدىل بولۇنغانلىقىدىن، ئەسلىدە 25-چىسىلا باشلانماقچى بولغان بېلەت تاشلاش 26-چىسىلاغا سۈرۈلدى. چۈنكى، باھالىغۇچىلارغا 60 قا يېقىن بلوگنى بىرمۇ-بىر تەكشۈرۈپ باھالاش ئۈچۈن 5 كۈن ۋاقىت يەتمىگەن ئىدى. كېسىپ ئېيتىمەنكى، ھېچبىر باھالىغۇچى ھېچقانداق بىر بلوگقا كۆزىنىڭ ئۇچىدا قاراپ قويۇپ باھا بەرمىدى. باھالاشنىڭ ئادىل بولۇشى ئۈچۈن باھالاش ھەيئەتلەرنىڭ سالاھىيىتى بىر-بىرىدىن مەخپىي تۇتۇلدى. ئالىم ئەھەت ئەپەندىنىڭ ھەيئەت ئىكەنلىكىنى قىسمەت بىلمەيتتى، قىسمەتنىڭ ھەيئەت ئىكەنلىكىنى كۆككەپتەر بىلمەيتتى. ئىشلار شۇ قەدەر ئىدىتلىق ئورۇنلاشتۇرۇلغان بولۇپ، كۆڭلىمىزدە پەقەت ۋە پەقەت بلوگگېر دوستلار ۋە تورداشلارنىڭ ئالدىدا ھەقىقىي مەسئۇل بولۇشتىن باشقا نەرسە مەۋجۇد ئەمەس ئىدى….
بۇ قېتىم بېلەت تاشلاشتا ئالدىنقى نۆۋەتلەردىكى ساۋاقلارنى قوبۇل قىلىپ، ساختا بېلەتتىن مۇتلەق ساقلىنىشنىڭ ئامالىنى ئىستىدۇق. ئاقىۋەت ھەيئەتلەر ئارا ئايرىم-ئايرىم كېڭىشىش ئارقىلىق ئىزدىنىش، مىسرانىم، بىلىك، نۇرقۇت، كروران قاتارلىق ئۇيغۇر تور دۇنياسىدىكى بىرقەدەر نوپۇزلۇق ھېسابلانغان، ھەم ئوخشىمىغان ساھەلەرگە ۋەكىللىك قىلىدىغان 5 مۇنبەرنى بېلەت تاشلاش سورۇنى قىلىپ بېكىتتۇق. مەزكۇر بېكەتنىڭ مەسئۇللىرىمۇ بۇ پائالىيەتنى يۈكسەك مەسئۇلىيەتچانلىق بىلەن قوللىدى. پائالىيەت سورۇنى قىلىنماقچى بولغان مۇنبەر پائالىيەت باشلىنىپ تاكى ئاخىرلاشقۇچە چوقۇم يېڭى ئەزا قوبۇللاشنى توختىتىشى كېرەك ئىدى. بۇ 5 مۇنبەر بىزنىڭ تەلىپىمىزنى تېز سۈرئەتتە بەجا كەلتۈرگەن بولدى. ئەمما، شۇنى قىستۇرۇپ ئۆتۈشنى مۇۋاپىق كۆردۈمكى، ئەسلى پىلانلغان مۇنبەر جەمئىي 7 بولۇپ، 2 مۇنبەر ئەزا قوبۇللاشنى توختىتشنى رەت قىلغانلىقى ئۈچۈن بېلەت تاشلاش سورۇنى قىلىنمىدى. كۆرۈپ يېتىش قىيىن ئەمەسكى، بىر ئىشنى ئەمەلىي ھەرىكەت بىلەن قوللاش ئۇنچىلىك ئوڭاي ئەمەس.
شۇنداق قىلىپ، نەتىجىمۇ چىققان بولدى. ئەمما، 5 مۇنبەردىكى ئوخشاش ئىسىملىك ئەزالارنىڭ تاشلىغان بېلەت مەسىلىسى ئالدىمىزغا قويۇلدى. مەسىلەن، يۈكسەل ئىسىملىك تورداش ئىزدىنىش، بىلىك، مىسرانىمدا ئوخشاش پائالىيەت قىلىدىغان بولسا، بۇ تورداشنىڭ يۇقىرىقى 3 مۇنبەردە تاشلىغان بېلىتىنى قانداق ھېسابلاش مەسىلىسى ئالدىمىزغا تاشلاندى. ئاخىرىدا، بىز 5 مۇنبەردىكى ئوخشاش ئىسىملىك ئەزا تاشلىغان بارلىق بېلەتنى 1 تال ئۈنۈملۈك بېلەت دەپ ھېسابلاشنى توغرا دەپ قارىدۇق. پەقەت شۇنداق قىلغاندىلا ھەقىقىي ئادىل نەتىجىگە چەكسىز يېقىنلىشىمىز دەپ ئويلىدۇق. شۇنىڭ بىلەن 1-چىسىلا سائەت 0 دىن تاكى سەھەر سائەت 4 كىچە كۆككەپتەر، نۇرقۇت، كروران تورىدى ئەنقا ۋە مەن بېلەت تاشلاش جەريانىنى تەكشۈرۈپ، ھەر بىر مۇنبەردىكى بېلەت تاشلىغۇچىلارنىڭ تەپسىلىي تېزىملىكىنى تۇرغۇزۇپ، بىرمۇ-بىر سېلىشتۇرۇش، تەكرار دەلىللەش ئارقىلىق ئىناۋەتسىز بېلەتلەرنى چىقىرىۋېتىپ، ئاخىرقى نەتىجىنى ئېلان قىلدۇق.
شۇنداق دەپ كېسىپ ئېيتالايمەنكى، 2011-يىللىق 10 چوڭ بلوگنى باھالاشقا مەيلى تەشكىللىگۈچى ھېسابلانغان مەن بولاي ۋەياكى باھالاش ھەيئەتلىرىنىڭ ھەربىر ئەزاسى، بېلەت تاشلانغان مۇنبەرلەرنىڭ مەسئۇللىرى بولسۇن ھەممەيلەن ناھايىتى مەسئۇلىيەتچانلىق بىلەن ئۆز ۋەزىپىمىزنى ئادا قىلىدۇق. رەسمىي نامزاتلىققا تاللانغان 20 بلوگ ھەقىقىي باھالاشتىن ئۆتۈپ ئاندىن تۇرغۇزۇلدى. ئەڭ ئاخىرقى 10 چوڭ بلوگمۇ بىرمۇ ساختا بېلەت ئارىلىشىپ قالماستىن تورداشلار تەرىپىدىن تاللاپ چىقىلدى. مېنىڭ نەزىرىمدە، بۇ قېتىمقى باھالاشنىڭ نەتىجىسى تارىختىكى ئەڭ ئادىل، ھەققانىي بولغان بىر نەتىجىدۇر!
ئەمما، گەپ بۇنىڭلىق بىلەن تۈگىمەيدىغانلىقى ئېنىق. جۈملىدىن، نەتىجە ئېلان قىلىنغاندىن كېيىن تورداشلارنىڭ ئىنكاسى كۈچلۈك بولدى. بەزىلىرى نەتىجىگە چىن كۆڭلىدىن قايىل بولۇپ، شەرەپ ئىگىلىرىنى سەمىمىي قۇتلۇقلىسا، بەزى تورداشلار پائالىيەتنىڭ جەريانى ۋە نەتىجىسىگە ئانچە رازى بولۇپ كېتىشمىدى. بەزى تورداشلار لىللا مەيداندا تۇرۇپ سەمىمىي پىكىر بەرگەن بولسا، بەزى تورداشلار تۈكى يوق پاراڭلارنى تولا قىلدى. سەمىمىي تەكلىپلەرگە قۇلاق سېلىپ، كېلەركى نۆۋەتلىك پائالىيەتلەردە پايدىلىنىشنى كۆڭلىمىزگە پۈككەن بولساق، تۈكى يوق پاراڭلارغا كۈلۈپ قويۇپ بولدى قىلدۇق. چۈنكى، ھېچ ئىش قىلمىغان كىشىگە ھېچكىم بىر نەرسە دېمەيتتى، ھەقىقىي ئىش قىلغاندا بولسا ياكى ئۇنداق ياكى مۇنداق گەپلەر بولۇنۇپ تۇرۇشى بۇ نورمال ئەھۋال ئىدى.
ئاخىرىدا، بىزنى چۈشەنگەن، بىزنى قوللىغان، مەدەت بەرگەن، سەمىمىي تەكلىپ بەرگەن تورداشلارغا چىن كۆڭلىمىزدىن تەشەككۈرلەر ئېيتىمىز! بىزنى چۈشەنمىگەن، قوللاشقا مۇھتاج پەيتلىرىمىزدە سۈكۈت قىلغان تورداشلاردىن ھەم رەنجىمەيمىز! قىلمىش-ئەتمىشلىرىمىزنى كۆرەلمىگەن، قەلبىنى رەشىك-ھەسەت قاپلاپ ئالغان، ئارقىمىزدىن پىتنە توقۇش بىلەن ئاۋارە يۈرگەنلەرنى ھەم كەچۈرىمىز، كۆڭلىگە ئىنساب تىلەيمىز!
خوش، دەيدىغاننى دېدۇق، قىلىدىغاننى قىلدۇق. بۇنىڭدىن كېيىن ھەم قىلىشقا تېگىشلىك ئىشىمىزنى داۋام ئەتكەيمىز!

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

ئۇيغۇرلاردىكى 2011 – يىللىق 10 چوڭ بلوگ

يۈكسەل — Sun, 01 Jan 2012 03:03:09 +0800

يۈكسەل بلوگى تەشكىللىگەن، ئەلداۋا ساغلاملىق تورى ۋە بىلكان شىركىتى ئىقتىسادىي جەھەتتە ئالاھىدە قوللىغان ‹‹ ئۇيغۇرلاردىكى 2011 – يىللىق 10 چوڭ بلوگنى باھالاش پائالىيىتى ›› كەڭ تورداشلار ۋە بلوگگېرلارنىڭ قىزغىن قوللاپ قۇۋۋەتلىشى نەتىجىسىدە، ئومۇمەن ناھايىتى ئۇتۇقلۇق ئېلىپ بېرىلدى. ئىزدىنىش، بىلىك، مىسرانىم، نۇرقۇت، كروران قاتارلىق 5 نوپۇزلۇق مۇنبەر مەزكۇر پائالىيەت ئۈچۈن ئادىل بېلەت تاشلاش سورۇنى ھازىرىلاپ بەردى( خۇشاللىنارلىق يېرى شۇكى، يۇقىرىقى مۇنبەرلەرنىڭ تېخنىكىلىق جەھەتتە كۈچلۈك قوللىشى نەتىجىسىدە بۇ قېتىم 1 مۇ ساختا بېلەت تاشلانماي، پائالىيەتنىڭ ئادىل ۋە چىن بولۇشى ھەقىقىي ئىشقا ئاشۇرۇلدى ). ھەرقايسى بلوگلار ، ئۇلۇغ – ئۇششاق تور بېكەتلەر مەزكۇر پائالىيەتنىڭ تەشۋىقاتى ئۈچۈن ئۆز چامىلىرىنىڭ يېتىشىچە مۇناسىپ جاي بېرىشتى. ئۇشبۇ مۇناسىۋەت بىلەن، مەزكۇر پائالىيەتنى قوللىغان بارلىق تورداشلار ۋە تور بېكەت – بلوگلارغا كۆپ تەشەككۈر ئېيتىمىز! مەزكۇر پائالىيەتنىڭ ئوڭۇشلۇق بولۇشى ئۈچۈن قىممەتلىك ۋاقىتلىرىنى ئاجرىتىپ، مىننەتسىز تەر تۆككەن ئالىم ئەھەت، قىسمەت، كۆككەپتەر، مىسرانىم، ئوسمانجان نوھ بىلىگيار، كروران، جۇلالىق قاتارلىق باھالاش ھەيئەتلىرىگە ئېھتراملار بولسۇن!

مەزكۇر پائالىيەتنىڭ نامزات كۆرسىتىش باسقۇچىدا جەمئىي 20 بلوگ نامزاتلىققا تاللىنىپ، تورداشلارنىڭ بېلەت تاشلاپ ئاۋاز بېرىشىگە قويۇلغان ئىدى. جەمئىي 2548 نەپەر تورداش بېلەت تاشلىغان بولۇپ، بۇنىڭ ئىچىدە 78 پارچە بېلەت تەكرار تاشلانغان بېلەت ( يەنى ئوخشاش ئىسىمدىكى 1 كىشى 5 مۇنبەردە 5 بېلەت تاشلىغان بولسا پەقەت 1 بېلەت دەپ ھېسابلاندى) دەپ قارىلىپ، ئۈنۈملۈك بېلەت 2470 پارچە بويىچە ھېسابلاندى. ئەڭ ئاخىرقى نەتىجە ھەرقايسى بلوگلار ئېرىشكەن بېلەتنىڭ جىق – ئازلىقىغا قاراپ چىقىرىلدى. تۆۋەندە، ناھايىتى قايناق ھاياجان بىلەن << ئۇيغۇرلاردىكى 2011 – يىللىق 10 چوڭ بلوگ >> شەرىپىگە ئېرىشكەن بلوگلارنى ئېلان قىلىمىز:

ئۇيغۇرلاردىكى 2011 – يىللىق 10 چوڭ بلوگ

دەرىجىسى	بىلوگ ئىسمى	تور مەنزىلى	ئىرىشكەن بىلەت سانى
1	80خالتا بلوگى	http://www.80halta.com	303
2	ئالىم ئەھەت بلوگى	http://www.alimahat.com	275
3	تورخۇمار بلوگى	http://www.torhumar.com	187
4	شاھ ئۇيغۇر بىلوگى	http://shahblog.net	185
5	جېك بلوگى	http://jeckblog.com	172
6	تەدبىركار بلوگى	http://www.tedbirkar.net	164
7	ئۇيغۇربەگ تور تۇرايى	http://www.uyghurbeg.net	161
8	ئىلقۇت بلوگى	http://blog.ilqut.com	122
9	ۋەتەن بلوگى	http://weten.me	120
10	كروران بلوگى	http://blog.kroran.net/	98

10 چوڭ بلوگنى مۇكاپاتلاش خۇسۇسىدا

1. مەزكۇر پائالىيەتتە بىرىنچى ۋە ئىككىنچى بولۇپ باھالانغان 80 خالتا بىلەن ئالىم ئەھەت بلوگىغا ئوخشاش ھالدا بىلكان شىركىتى تەمىنلىگەن تۆۋەندىكى بىلكانپەد مۇكاپات سۈپىتىدە بېرىلىدۇ.
بىرىنچى باھالانغان بلوگ ئۈچۈن: 8 دىيۇيملىق بىلكان پەد ( WiFi نەشرى). باھاسى: 2398 يۈەن.
ئىككىنچى باھالانغان بىلوگ ئۈچۈن: 8 دىيۇيملىق بىلكان پەد ( WiFi نەشرى). باھاسى: 2398 يۈەن.

2. قالغان بلوگلارغا ئەلداۋا ساغلاملىق تورى قاتار بويىچە، ئۈچىنچى بولغان تورخۇمار بلوگىغا 500 يۈەن، تۆتىنچى بولغان شاھ ئۇيغۇر بلوگىغا 400 يۈەن، بەشىنچى بولغان جېك بلوگىغا 300 يۈەن، قالغان 5 بلوگنىڭ ھەر بىرىگە 100 يۈەندىن نەقپۇلنى مۇكاپات سۈپىتىدە بېرىدۇ.
مۇكاپات نەقلەشتۈرۈش ۋاقىتى
مۇكاپات بارلىق بلوگلارغا 1-ئاينىڭ 4-كۈنىدىن باشلاپ ئەمەلىيلەشتۈرۈلىدۇ. نەقپۇلنىڭ ۋاقىت سۈرۈكى 3 كۈن، بىلكانپەدنىڭ 2 ھەپتە.

ئاخىرقى سۆز

2011 – يىلى ئۇيغۇر بلوگچىلىقىمىز ئاجايىپ تېز يۈكسەلگەن بىر يىل بولدى. ئۇلۇغ-ئۇششاق تاراتقۇلارنىڭ نەزىرى بۇ ساھەگە تىكىلدى. ئارقا-ئارقىدىن سۆھبەتلەر ئۇيۇشتۇرۇلدى، فىلىملەر ئىشلەندى. بۇقايناق مەنزىرىنى كۆرۈپ ئۆزىنى باسالمىغان يۈكسەلمۇ «ئاڭلا جاھان، 2011 – يىلى ئۇيغۇر بلوگ يىلىدۇر ! » دەپ ئەلگە چوقان توۋلىغان ئىدى.
ئۇيغۇر بلوگچىلىقى يۇقلۇقتىن بارلىققا كېلىپ ،نۇرغۇن ئوي – دوڭغۇللارنى بېشىدىن كەچۈرۈپ ، بۈگۈنكى كۈنگە كەلگەندە جۇش ئۇرۇپ راۋاجلىنىشتەك تەرەققىيات باسقۇچىغا قەدەم قويدى. بلوگگىرلار قوشۇنى زورايماقتا، بارغانسېرى تاۋلانماقتا، بلوگلار بارغانسېرى پىشىپ يېتىلمەكتە، سەرخىللاشماقتا. ئۇيغۇر تورچىلىقىدا ئوينايدىغان رولى بارغانسېرى گەۋدىلەنمەكتە. جۈملىدىن ئۇيغۇر تور ئاممىسىنىڭ دىققەت – نەزىرى بارغانسېرى ئۇيغۇر تور ئاسمىنىدىكى بلوگدىن ئىبارەت بۇ يورۇق يۇلتۇزغا ئاغدۇرۇلماقتا. ئەل بلوگگىرلاردىن يېڭى نەتىجىلەرنى كۈتمەكتە…
ئەڭ ئاخىرىدا، << ئۇيغۇرلاردىكى 2011 – يىللىق 10 چوڭ بلوگنى باھالاش >> پائالىيىتىنىڭ تەشكىللىگۈچىسى بولغان يۈكسەل بلوگى ۋە باھالاش ھەيئەت گۇرۇپپىسىدىكى بارلىق ئەزالار يۇقىرىدا جاكارلانغان << ئۇيغۇرلاردىكى 2011 – يىللىق 10 چوڭ بلوگ >> شەرىپىگە ئېرىشكەن ھەرقايسى بلوگلارنى قىزغىن قۇتلۇقلايدۇ ۋە ئۇلارغا يېڭى يىلدا يەنىمۇ زور نەتىجىلەرنى تىلەيدۇ.

بۈگۈن سىلەر ئۆزۈڭلاردىن پەخىرلىنىشكە ھەقلىق! بۈگۈن ئەلنىڭ ئالقىشى پەقەت سىلەر ئۈچۈن!!! ھارمىغايسىلەر ئۇيغۇر بلوگچىلىقىدىكى ھارماس تۇلپارلار !

بۇ يازمىنى ئوقىغان تورداشلار ماۋۇ يازمىلارنىمۇ ئوقىۋاتىدۇ :

رادىئو دولقۇنلىرىدا «ئەلداۋا ساغلاملىق تورى»

يۈكسەل — Tue, 27 Dec 2011 01:26:27 +0800

2011–يىلى 12–ئاينىڭ 27-كۈنى ( سەيشەنبە ) ئۈرۈمچى ۋاقتى ئەتتىگەن سائەت 8:00 دە شىنجاڭ خەلق رادىئوسىنىڭ نادىر پروگراممىسى ھېسابلانغان «بوغدا ساداسى» نىڭ «ئەتراپىمىزدىكى ئىشلار» سەھىپىسىدە شىنجاڭ خەلق رادىئو ئىستانسىسىنىڭ مۇخبىرى مۇقەددەس بىلەن ئەلداۋا ساغلاملىق تورىنىڭ مەسئۇللىرىدىن ئەلقەم ئىلھام يۈكسەل ۋە ئوسمانجان نوھ بىلىگيار ئىشتراكچىلىقىدىكى«ئەلداۋا ساغلاملىق تورى» ھەققىدە تەپسىلىي زىيارەت سۆھبىتى ئاڭلىتىلغان ئىدى. تۆۋەندە مەزكۇر سۆھبەتنىڭ ئۈن ھۆججىتى بېرىلدى، ساغلاملىقىغا كۆڭۈل بۆلگۈچى كەڭ تورداشلارنىڭ ياقتۇرۇپ ئاڭلىشىنى ئۈمىد قىلىمىز!

شىنجاڭ خەلق رادىئو ئىستانسىسى

ئەلداۋا ساغلاملىق تورى

2011-يىلى 12-ئاينىڭ 26-كۈنى